«Дауыс беру күніне дейінгі екі күнде кандидатты тіркеу туралы шешімнің күшін жоюға немесе бұған дейін тіркеуден шығарылған кандидатты қайта тіркеуге рұқсат етілмейді. Осыны ескерсек, қалған кандидаттардың барлығы алдағы сайлауға қатысатын болады», — дейді Бақыт Мелдешов.
Оның сөзіне қарағанда, қазіргі уақытта барлық қажетті қорғау дәрежелері бар жасырын дауыс беруге арналған бюллетеньдер әзірленген. Сайлау заңнамасына сәйкес бюллетеньдер сайлау күніне бір күн қалғанда тиісті аумақтық сайлау комиссияларына жеткізіледі.
Еске сала кетейік, Парламент Сенаты депутаттарының сайлауында дауыс беру 2014 жылғы 1 қазанда таңдаушылардың (мәслихаттардың — ред.) отырысында өтеді. Таңдаушылардың бірлескен отырысына облыстың барлық мәслихаттарынан өкіл болатын, сайланған депутаттар санының елу пайызынан астамы қатысса, ол заңды деп саналады. Дауыс беру заңды болуы үшін таңдаушылардың бірлескен отырыстарына таңдаушылардың елу пайызынан астамы дауыс беруге қатысулары тиіс. Дауыс беруге қатысқан таңдаушылардың елу пайызынан астамының дауысын алған кандидат сайланған болып саналады. Ал егер дауыс берудің бірінші турына екіден астам кандидат қатысса және олардың бірде-бірі жеңіске қажетті дауыстар жинай алмаса, сол күні басқа кандидаттармен салыстырғанда ең көп дауыс жинаған екі кандидаттың арасында екінші тур өтеді. Екінші турда басқа кандидатқа қарағанда дауыс беруге қатысқан таңдаушылардың дауыс көпшілігін алған кандидат жеңіске жетті деп есептеледі.
1 қазанда өтетін ҚР Парламенті Сенатының депутаттарын сайлауына қатысты кандидаттардың үгіт-насихат науқаны бүгін, 29 қыркүйекте 24.00 сағатта аяқталады.
Оның айтуынша, 2014 жылдың 30 қыркүйегінде, сонымен қатар, дауыс беретін күн — 1 қазанда кез келген сайлау алдындағы үгітке тыйым салынады.
«Үгіт науқанының шеңберінде Сенат депутаттығына кандиаттардың таңдаушылармен кездесулер өткізу кестелеріне сәйкес, 11-29 қыркүйек аралығында 266 кездесу өтті. 48 республикалық және 150 өңірлік басылымда, 16 республикалық және 30 өңірлік телеарналарға, сонымен қатар, 7 ақпарат агенттіктер мен 108 танымал қоғамдық-саяси интернет-ресурстарына мониторинг жүргізілді. Соған сәйкес, 1 тамыз бен 28 қыркүйек аралығында БАҚ-та сайлау науқанына арналған 900-ден астам материал жарық көрді», — дейді Б. Мелдешов. Мұның 256-сы электрондық БАҚ-та, 150-і баспа және 495-і интернет желісінде шыққан.
«Дауыс беруге дейінгі бес күн бойы және дауыс беру күні қоғамдық пікірді сұрау нәтижелерін, сайлау қорытындыларының болжамдарын, сайлауға байланысты басқа да зерттеулерді БАҚ-та жариялауға рұқсат етілмейді», — деп еске салды ОСК хатшысы.