Серік Жарынов бұл қадамға Қанат деген полиция қызметкерінің қысымына шыдамағаннан кейін барыпты. Айтуынша әлгі тәртіп сақшысы статистиканы жақсарту үшін оны ұсақ қылмыстар жасауға мәжбүрлеген. Келіспесе қол жұмсап қорқытып үркітеді екен. Прокуратураға сан рет шығымданса да, құлақ асар жан табылмаған соң өзіне осылай назар аудартуға бел буыпты. Биіктігі 30 метр мұнараның үстінде 2-3 сағат бойы біресе шешініп, біресе мойнына қылбұрау салып ойына келгенін істеді. Оқиға орнына жеткен прокурор мен Теміртау қаласы ішкі істер басқармасының бастығы оны мұнарадан түсуге әрең көндірді. Ол үшін тіпті шаһардың бас полицейдің өзі мұнараның ортасына дейін көтерілді. Ақыры аман-есен жерге түскен Серік Жарынов өзіне қысым көрсететін полицейдің үстінен арыз жазу үшін прокурорларға еріп кетті.