Облыстық энергетика және коммуналдық шаруашылық басқармасының басшысы Бақыт Сүйеновтың айтуынша, биыл республикалық бюджеттен облыстағы шіркей, сары масаларды және егеуқұйрықтармен күресу мақсатында 170 миллион теңге бөлінген. Оның ішінде Павлодар қаласына 148 миллион теңге, Екібастұзға 12,2 миллион және Ақсу қаласына 10,3 миллион теңге қарастырылған болатын. Өткен жылы облыстағы үш қалаға 190 миллион теңге бөлінді. Ол кезде дәрі-дәрмектің бір литірі 1800 теңге тұрса, биыл 2232 теңгеге дейін жоғарылаған. Ал ауылдарға бірнеше жыл бойы осы шараға қаражат мүлдем бөлінбейді. — 25 мамырға дейін қаладағы жағдай бірқалыпты болды. Бұл шіркейді солтүстік-шығыстан соққан жел салдарынан өңделмей қалған аймақтан қала ішіне айдап әкелді, — деді Б.Сүйенов.
Бұл ретте, мекеме басшысы қалаларда өткен шіркейге қарсы шараны нәтижелі болмағанын да алға тартты. Қала бойынша өңдеу кейбір жерлерде 9 рет, ал кейбір жерлерде 4 ретке дейін төмендеді. — Шіркей мен сары маса биыл қала тұрғындарына маза бермейтін болды. Жағдай ушығып барады. Қала ішінде шіркейлерді улауды қалай ғана жоспарлағансыздар?, — деп сұрады облыс әкімі. Бақыт Сүйенов болса, мәселенің алдын алу мақсатында бір ғана жол бар екенін айтты. Ол, республикалық бюджеттен шіркей мен егеуқұйрықтармен күреске қыркүйекке дейін бөлінген қаражатты қазір шіркей мен сары масаларды улауға жұмсау керек екенін айтты. — Қазір уақытта шіркейдің белсенділігіне байланысты күшейтілген тәртіпте жұмыс істеуге бел будық, — деді ол. Ғалымдардың айтуынша, инеліктің шығуына дейін, яғни соңғы қоңырау кезінде шіркейдің көбеюі белең алады. Сондықтан осы уақытта барлық қаражатты игеруді шештік. Негізгі бөліктерге жағалау мен жайылымдардың бойы, Ертістің оң және сол жағасы, сондай-ақ, қаланың ішінде: теміржол сапаржайы, Ертіс өзені арқылы өтетін көпір және Усолка шағын ауданы кіреді. Енді полиция қызметкерлерінің көмегіне жүгініп, қала тұрғындарын кешкі сағат 9-дан 10-ға дейін өңдеу жұмыстары жүргізілетіні туралы ескерту керек. Бұл мақсатта 50 миллион теңге бөлуіңізді сұраймыз.