ҚР СІМ баспасөз қызметінің хабарлауынша, аталған шараға Грекияда тіркелген дипломатиялық корпустың мүшелері, ғылыми-зерттеу топтары, БАҚ өкілдері, сондай-ақ аталған оқу орнының профессорлық-ұстаздық құрамы мен тыңдаушылары қатысты.
Іс-шараға қатысушылар қазақстандық «G-global» бастамасымен танысты. Сонымен қатар «дөңгелек» үстел барысында Қазақстанның «EXPO-2017» мамандандырылған көрмесі, Астана экономикалық форумы, «АТОМ» жобасы, Әлемдік және дәстүрлі діндер көшбасшылары съезі сияқты халықаралық бастамалары жайында да кең мағлұмат берілді.
Философия докторы, Крит технологиялық университетінің профессоры Д.Пателис «G-global: XXI ғасыр әлемі» кітабында баяндалған идеяларға қызығушылық білдіріп, Қазақстанның демократиялық өзгерістері екпінін және әлеуметтік-экономикалық дамуының қарқынды динамикасын атап өтті.
«Дөңгелек» үстел аясында аудитория назарына «Welcome to Kazakhstan» тұсаукесерлік бейнефильмі көрсетілді.