Желтоқсанға дейін жылы ауа-райына еті үйренген алматылықтар қыстың мұндай тосын мінезіне дайын болмаса керек. Небәрі бір тәулік ішінде қала ішін қалың қар басып қалды. Салдарынан көшеде шыққан жұрт шетінен сүрініп, жазатайым құлап жатыр. Таңнан бері аурухана іші де кісіге толып қалған. Төсекке таңылғандардың көбі – көктайғақта қол-аяғын сындырып алғандар. Жедел-жәрдемдегілер де «адамдарды тасып үлгере алмай жатырмыз» дейді. Өйткені осындай алып мегаполиске тек 150 көлік қана қызмет көрсетіп жатыр екен. Ал табан асты жауған қар онсыз да телефон тұтқасында тынымсыз қоңыраулар қабылдаған қызметті мүлде титықтатып жіберген.
Нұржан Әбіләкімұлы, Алматы қаласы жедел жәрдем станциясы бас дәрігерінің орынбасары:
-Ауа-райы күрт өзгерген кезде, жер тайғақ болса жолаушылар немесе жаяу жүргіншілер өте сақ болғаны дұрыс. Жолда қарау керек, бағдарлау керек, бағалау керек. Өйткені, кез-келген жарақат немесе кез-келген көлік оқиғасында мерттіккен жағдайлар да болды.