Бұл туралы Caravan.kz медиа порталы хабарлайды.
Фестивальге қатысушылар EXPO аумағынан басталып, Түркістан және Ақмешіт көшелері арқылы Abu Dhabi Plaza бағытына дейін жүгіріп, қайтадан бастапқы нүктеге оралды. Шара барысында 10, 3 және 1 шақырымдық қашықтықтар бойынша жарыстар ұйымдастырылды.
Jüregımnıñ Jenımpazy фестивалі 2018 жылдан бері өткізіліп келеді. Негізгі мақсат – трансплантацияны күтіп жүрген пациенттерге қолдау көрсету, қоғам арасында донорлық туралы ақпаратты арттыру және салауатты өмір салтын насихаттау.
Фото: Іс шара ұйымдастырушылары ұсынған
Фестивальге қатысушылар саны да жыл сайын өсіп келеді. Мәселен, 2024 жылы шараға 4 200-ден астам адам қатысса, 2025 жылы олардың саны 5 мыңға жуықтаған.
Heart Center Foundation қоғамдық қорының директоры Мұрат Зауыровтың айтуынша, мұндай шаралар трансплантация мәселесін қоғамға ашық жеткізуге мүмкіндік береді.
«Jüregımnıñ Jenımpazy жүгіру-фестивалі қоғам үшін өте қажет деп санаймын. Осындай жүгірістер арқылы біз трансплантация мәселесінің бар екенін көрсетіп, салауатты өмір салты арқылы қиын тақырыптарды талқылауға мүмкіндік аламыз», – деді ол.
Оның сөзінше, елімізде трансплантация бойынша оң динамика бар. Мысалы, 2022 жылы Қазақстанда жүрек ауыстыру бойынша небәрі 2-3 ота жасалса, 2025 жылы мұндай 18 ота орындалған.
Алайда Қазақстанда мәйіт донорлығының көрсеткіші әлі де төмен. Мұрат Зауыровтың айтуынша, мәйіттік трансплантация негізінен 1-2 ірі қалада ғана жүргізіледі. Ал оңтүстік және батыс өңірлерде бұл бағыт бойынша ақпараттандыру жұмыстары жеткіліксіз.
Фото: Іс шара ұйымдастырушылары ұсынған
Фото: Іс шара ұйымдастырушылары ұсынған
«Трансплантация мәселесіне қатысты әзірге Jüregımnıñ Jenımpazy сияқты жүгіру шарасы ұйымдастырылады. Қоғамды одан әрі ақпараттандыру үшін мұндай фестивальдерді басқа қалаларда да өткізуіміз керек», – деді қор директоры.
Қазіргі таңда елімізде 4208 адам бүйрек трансплантациясын күтуде. Бұдан бөлек, 293 адамға бауыр, 208 адамға жүрек, 30 адамға өкпе, ал 5 адамға «жүрек-өкпе» кешенін трансплантациялау қажет.
Фестивальге трансплантациядан кейінгі өмірін жалғастырып жүрген адамдар да қатысты. Солардың бірі – бүйрек трансплантациясын жасатқан Анар Шайсұлтанова.
Оның айтуынша, жастайынан денсаулығына байланысты қиындықтарға тап болған. 30 жасында қос бүйрегінің жұмысы тоқтап, 2018-2022 жылдары гемодиализ алған. Ал 2022 жылы мәйіттік донордан бүйрек трансплантациясы жасалған.
«Содан бері төрт жыл бойы баламның қасында болып, өмірдің әр сәтін бағалап келемін. Jüregımnıñ Jenımpazy жүгіру-фестиваліне 2022 жылдан бері белсенді қатысып жүрмін. Бір шақырым ғана жүгірсем де, мен үшін бұл – өмір үшін күрес. Менің ойымша, Jüregımnıñ Jenımpazy трансплантация кезегінде тұрған жандарға үміт сыйлайды», – деді ол.
Айта кетейік, 2026 жылдың алғашқы алты айында Қазақстанда ағза трансплантациясы бойынша 150 отажасалған. Оның 108-і – бүйрек, 31-і – бауыр, 5-еуі – жүрек, 2-еуі – өкпе трансплантациясы.
Фестиваль барысында тұрғындарға ағза донорлығы мен трансплантация мәселелері бойынша ақпарат берілді. Сонымен қатар шарада Орынхан, Мархаба Сәби, Бүркіт және Аиша өнер көрсетіп, қатысушыларға көтеріңкі көңіл-күй сыйлады.
Айта кетейік, Jüregımnıñ Jenımpazy жүгіру-фестивалі биыл 23 тамызда өтетін Ұлттық құрылтайды қолдау және «Жаңару үшін дауыс бер» бастамасын насихаттау мақсатында ұйымдастырылды.