Жиынға ҚР қауіпсіздік кеңесінің хатшысы Болат Өтемұратов, ҚХР қоғамдық қауіпсіздік министрі Чжоу Юнкан, Қырғызстан сыртқы істер министрінің орынбасары міндетін атқарушы Кәдірбек Сарбаев, Ресей қауіпсіздік кеңесінің хатшысы Игорь Иванов, Тәжікстан қауіпсіздік кеңесінің хатшысы Амиркул Азимов пен Шанхай ынтымақтастық ұйымының атқарушы хатшысы Чжан Дэгуан қатысады.
Жиынның күн тәртібіне Шанхай ынтымақтастық ұйымына мүше елдердің кеңістігі мен көршілес өңірлерде қауіпсіздік пен тұрақтылықты қамтамасыз ету, Шанхай ынтымақтастық ұйымына мүше елдер арасында лаңкестік, сепаратизм және экстремизмге қарсы күрес саласындағы ынтымақтастықты нығайту мәселелері енгізілген. Сонымен бірге жиынға қатысушылар Шанхай ынтымақтастық ұйымына қатысты бірқатар құжаттардың жобасын қарайды.