- Жалпы, қала бойынша күніне 800 тоннаға жуық қоқыс шығарылады. Ал, зауытты толық өндіріске шығару үшін 3 жылдай уақыт керек. Алғашқыда өндіріске шығу үшін аз-кем кедергілер болды. Дегенмен, қаладан келетін барлық қоқысты сұрыптап, өңдеп жатырмыз. Қоқыс алдын-ала сұрыпталмағандықтан арасында ірі қалдықтар да кездеседі. Әйтсе де, барлығын өңдеп, полигонға кететін қоқысты үш есе жеңілдетуге күш салудамыз ,- деді «Алтын ТЕТ» ЖШС бас директоры Егор Зингер.
Оның айтуынша, сұрыпталған қалдықтардан қағаз, экомақта, пластмасса, полиэтилен, пластика, қара және түсті металл шығарылады. Қазір тұрғындар арасында қоқыс тастау әдебін қалыптастыру да қарастырылуда.
«Мамандар 2015 жылға қарай зауытқа биогаздалған қондырғы орнатуды жоспарлап отыр. Сол уақытта полигонға қоқыстың 30 пайызын ғана жеткізіліп, қалғаны қайта өңделіп шығарылмақ. Елорда қажеттілігін толық өтеп отырған кешен осылайша «Жасыл экономикаға» көшудің озық үлгісін көрсетуге дайындық үстінде» делінген хабарламада.