Дегенмен, әзірге бірнеше POS-терминалдан жаппай бас тарту болады деп күтуге болмайды. Бұл туралы Ұлттық банк төрағасының орынбасары Бинұр Жәленов мәлімдеді, деп хабарлайды тілші.Tengrinews.kz.
Бірыңғай QR енгізілген соң кәсіпкерлер кез келген банктің төлемін бір терминал арқылы қабылдау мүмкіндігіне ие болады. Жәленовтің айтуынша, қазір көптеген кәсіпкерлерде әртүрлі банктердің екі, үш немесе одан да көп POS-терминалдары орнатылған. Жаңа жүйе іске қосылғаннан кейін бұған қажеттілік жойылуы мүмкін, алайда түпкілікті шешімді бизнес өкілдерінің өзі қабылдайды.
Ұлттық банк төрағасының орынбасары заңнамада бірыңғай QR жүйесіне қатысушылар үшін кемсітушілікке жол бермейтін тарифтер принципі бекітілгенін еске салды.
«Кем дегенде, тарифтер қазіргі баламалардан жоғары болмауы тиіс. Оның үстіне, біз олар төмен болады деп күтеміз, өйткені банктердің QR-төлемдерге қызмет көрсету шығындары карточкалық транзакцияларға қарағанда әлдеқайда аз», — деді ол.
Жәленовтің сөзінше, төлем нарығы нарықтық принциптерге негізделгендіктен, Ұлттық банк банктер үшін тарифтер белгілемейді.
«Біз төлем нарығы бәсекеге қабілетті салалардың бірі деп санаймыз, ал бірыңғай экожүйені құру және жүйеаралық кедергілерді жою пайдаланушыларға ыңғайлы болады және тарифтердің төмендеуіне ықпал етеді», — деп атап өтті Жәленов.
Сонымен қатар, Ұлттық банк бизнестің бірнеше терминалдан жаппай бас тартатыны туралы әзірге болжам жасауға дайын емес.
«Қазір кәсіпкерлер екі немесе үш терминалдан жаппай бас тартады деп айту қиын. Тәжірибе қалай қалыптасатынын көрейік. Біраз уақыттан кейін біз мониторинг нәтижелерімен міндетті түрде бөлісеміз», — деп түйіндеді ол.
Бірыңғай QR-код қашан іске қосылады
Қазақстанда бірыңғай QR-кодты толыққанды іске қосу 19 шілдеге жоспарланған. Жүйе сатушының қай банктің QR-кодын қолданатынына қарамастан, кез келген банктің қосымшасы арқылы төлем жасауға мүмкіндік береді. Сервисті кезең-кезеңімен кеңейту 7 шілдеден басталды.
Бұған дейін Ұлттық банк бірыңғай QR Банкаралық мобильді төлем жүйесі негізінде құрылатынын және ол әртүрлі банктердің бірнеше POS-терминалын орнату қажеттілігін жойып, нарық қатысушылары арасындағы бәсекелестікті күшейтуі тиіс екенін хабарлаған болатын.