Қажылық ғибадатын өтеу - Алланың ұлы нығметі. Бас мүфти Ержан қажы Малғажыұлы осындай сауабы теңдессіз ұлы сапарға баруымыз әуелі Жаратушы Иеміздің, содан кейін тәуелсіздігіміздің арқасында жүзеге асып жатқанына тоқталды.
«Қажылық - сауапты сапар, қиындығы мол, әрбір қажыдан үлкен сабырлылық, терең төзімділікті, риясыз тақуалықты талап етер ғибадаттың түрі. Қажылық сапары сауда-саттық немесе туристік сапар емес, өзіндік ерекшелігі бар ғибадат жолы, сондықтан да әрбір мұсылманнан тиісті дайындықты, оны орындаудың өзіндік ерекшеліктері жайлы мағлұматты білуді талап ететін құлшылықтың түрі. Пайғамбарымыз (с.ғ.с.): «Кімде-кім Алла тағала ризашылығы үшін қажылық жасаса, жаман сөзден, жаман қылықтардан, күнәлардан сақтанса анасынан туылғандай пәк болып қайтады», - деген. Қажылықтың әр минутын құлшылықпен, дұға-тілекпен өткізудің сауабы мол. Осы сапарда елімізге амандық, жерімізге тыныштық, дініміздің жанашыры Елбасына, дін қамында жүрген азаматтарға есендік, дендеріне саулық тілесек абзал болады. Алла тағала сапарларыңызды оңды етіп, елімізге аман-сау оралуларыңызды тілеймін», - деді Ержан қажы Малғажыұлы.
Биыл Қазақстан мұсылмандары діни басқармасы жанынан құрылған миссия мүшелері - дәрігерлер медициналық көмек көрсетсе, 30 имам қажыларға уағыз-насихат айтып, бағыт-бағдар беретін болады. ҚМДБ Миссия жұмысына Бас мүфтидің бірінші орынбасары Серікбай қажы Ораз төрағалық етпек.
Бүгінде Алматы қаласындағы Мәдина мешітінде ашылған Қажыларды оқыту орталығында отандастарымыз арнайы дәрістен өтуде. Қажылық сапарында жиі кездесетін сұрақтарға Діни басқарма мамандары жауап беруде.
1993 жылдың жазында Қазақстаннан тұңғыш рет 300 адам қажылық сапарына аттанды. Сол жылдан бастап қажылыққа ниет білдірген жерлестеріміздің саны артып келеді. 2013 жылы олардың саны 4400-ге жетті.
Қажылық парызын өтеу үшін Сауд Арабиясына осы уақытқа дейін 600 мыңдай адам келіп үлгерді, деп жазады muslim.kz.
Сауд Арабиясының Қажылық істері жөніндегі министрліктің статс-хатшысы Хаттем Қазы хабарлағандай, қажыларға қызмет көрсету үшін 40 мыңдай адам жұмылдырылған. Ханзада Мұхаммед ибн бин Әбді Азиз атындағы әуежай жұма күні қажылар мінген 96-дан аса рейсті қабылдаған. Ал Жиддадағы әуежай күн сайын 100-ден аса рейсті қабылдайтын көрінеді.
Үстіміздегі жылы қажылық парызын өтейтіндердің қатары жылдағыдан аз болуы мүмкін. Оған себеп, Саудиялықтар қажылық квота көлемін өз отандастарына 50, ал шетелдіктерге 20 пайызға кеміткен еді.