Астана, Алматы қалалары мен Ақтөбе, Қарағанды облыстарынан барған делегаттар көрмеге қатысушыларды еліміздің туристік мүмкіндіктерінен хабардар етті, деп хабарлайды ҚР ИЖТМ Туризм индустриясы комитеті.
Айтулы іс-шараға туризм индустриясының барлық құрылымдары, атап айтқанда, халықаралық туризм федерациялары, ұлттық және өңірлік туристік ұйымдар, туристік және транспорттық агенттіктер мен туроператорлар, қонақ үйлер, сақтандыру компаниялары т.б. қатысты. Сондай-ақ әлемнің 135-тен астам елінен шамамен 20 мыңдай адам келді.
ҚР ИЖТМ Туризм индустриясы комитетінің төрағасы Марат Иғалиевтің айтуынша, Қазақстан әлеуетті инвесторлардың қызығушылықтарын оятты. Бірінші кезекте олардың назарына Маңғыстау облысындағы Кендерлі демалыс орны мен Оңтүстік Қазақстан облысындағы Қасқасу тау-шаңғысы демалыс орнын дамыту жобасы ілікті. Шара аясында қазақстандықтар шетелдік әріптестерімен туризм саласын дамытуға қатысты келіссөздерге қол қойды, деп жазады strategy2050.kz.