Өзбекстанның Upl.uz сайты бокстан Таиландта аяқталған Азия чемпионатын қорытындылады. Сайтта жарық көрген мақалада бокстан Өзбекстан құрамасы әлемдегі ең үздік командалардың бірі ретінде көрсетіліп, қазақ боксшыларына қатысты да пікір айтылған, деп хабарлайды Caravan.kz медиа порталы 1bol.kz-ке сілтеме жасап.
Еске салсақ, Азия чемпионатында ерлер арасында Қазақстан боксшылары 5 алтынға қол жеткізсе, Өзбекстан 7 алтын медаль жеңіп алып, жалпыкомандалық есепте бірінші орын алды.
«Бокстан Өзбекстан құрамасы Таиландта өткен Азия чемпионатында жалпыкомандалық есепте бірінші орын алып, әлемдегі ең үздік команда екенін дәлелдеді. Біз бұл жарысқа негізгі құрамдағы боксшыларды, оның ішінде Олимпиада чемпиондарын алып бармағанымызды да ескеру керек. Ал, екінші орынды Қазақстан құрамасы иеленіп, өзінің мықты дайындықпен келгенін көрсетті.
Өзбек сарапшылары сондай-ақ Қазақстан боксшыларындағы ең басты проблема деп физикалық дайындығын атаған.