Golden Boy промоутерлік компаниясының иесі Оскар Де Ла Хойяның айтуынша, жекпе-жекті өткізуден БАӘ-де үмітті.
“Маған әуелі Дубайдан, сосын Ұлыбританиядан қоңырау түсті. Бұл жекпе-жекке бүкіл әлем қызығып отыр. Келіссөздер басталған соң бұл мәселе де жуық арада шешіледі”, – дейді Де Ла Хойя.
Қазіргі таңда Головкин-Альварес жекпе-жегіне сегіз арена кезекте тұр. Оның негізгі үшеуі: Лас-Вегастағы T-Mobile Arena, Нью-Йорктегі Madison Square Garden және Далластағы AT&T Stadium стадионы.
Жекпе-жек АҚШ жерінен тыс орында өтуі де ықтимал. Бұл ретте Лондондағы “Уэмбли” стадионы мен Мехикодағы “Ацтек” стадиондары өтініш білдірген. Сондай-ақ, Қазақстан кәсіпқой бокс федерациясы да бұл кездесудің елімізде өткізілуіне қатысты пікір білдірді.
“Біз бұл мәселені мұқият талқылап, жоспарлағанбыз. Негізінде бұл жекпе-жекті ұйымдастыруға бізде мүмкіндік бар. Егер ол қыркүйектің басында болса Астанада өткізе алар едік. Алайда ол кезде ЭКСПО көрмесі аяқталып кетеді. Головкин де, “Канело” да бұл жекпе-жектен көп табыс тапқысы келетіндері белгілі. Сол себепті АҚШ, Мексика және Англияның мүмкіндіктері жоғары”, – деді Федерацияның вице-президенті Виктор Демьяненко.
Головкин-Альварес жекпе-жегі 16 қыркүйекте өтеді. Кездесуде Головкинге тиесілі WBC, WBA (Super), IBF және IBO белдіктері бәске қойылмақ.