Күтпеген жерден халықтан жәрдем сұраған полиция ішкіштермен жалғыз арпалысып шаршаған сияқты. Ішкі Істер министрлігі көлікті мас күйінде айдайтындарды нағыз қылмыскер дейді. Өйткені, жаппай кісі өлімімен аяқталып жатқан апаттың 90 пайызы сондайлардың кесірінен болады. Мәселен, рейдке шыққан Астана полициясының қызметкерлері үш күн ішінде мыңнан астам мас жүргізушіні ұстады. Түнді айтпағанда күндіз де ұрттап алып жылдамдықты арттыратындар көп болып шықты. Заңға енгізілген өзгеріске сай, енді олар кемі 800 мың теңге айыппұл төлейді.