Бұл туралы Caravan.kz медиа порталы Sputnik.kz-ке сілтеме жасап хабарлайды.
Қазақстан ірі қара мал терісін Қытай Халық Республикасына экспорттайды, деп хабарлады Ауыл шаруашылығы министрлігі.
Ауыл шаруашылығы министрлігі мен ҚХР Бас кеден басқармасы Қазақстаннан Қытайға экспортталатын ірі қара малдың терісіне инспекциялық, карантиндік және ветеринариялық-санитариялық талаптар туралы хаттамаға қол қойды.
Құжат елдің экспорттық әлеуетін, отандық өнімнің халықаралық нарықтағы бәсекеге қабілеттілігін арттыруға ықпал етеді.
"Ірі қара терісі осындай келісімдермен реттелетін ауыл шаруашылығы өнімдерінің 11-ші түрі болды. Бұған дейін мұздатылған сиыр еті, қой еті, шошқа еті, бал, балық, сүт өнімдері, жүн шикізаты, асыл тұқымды және сойылатын жылқылар, сондай-ақ сойылған ірі қара малды экспорттауға хаттамаларға қол қойылған болатын", - деп жазылған хабарламада.
Биыл шілде айында ірі қара малды сою мақсатында экспорттауға қатысты осындай хаттамаға қол қойылды.
Құс шаруашылығы өнімдерінің, қосалқы өнімдердің, биенің құрғақ сүтінің және басқа да тауарлардың экспортын кеңейту жоспарланып отыр.