Бұл туралы Caravan.kz медиа порталы Tengrinews.kz-ке сілтеме жасап хабарлайды.
Конституциялық комиссия Қазақстанның жаңа Конституциясының бірінші жобасын дайындады. Қазақстанның жаңа Конституциясының бірінші жобасы Конституциялық реформа жөніндегі комиссияның алтыншы отырысында қаралды. Оны дайындау кезінде кейінгі 6 айда түскен азаматтардың, қоғамдық ұйымдар, саяси партиялар мен сарапшылардың ұсыныстары, сондай-ақ, комиссия мүшелерінің пікірі, ескертулері мен ұсыныстары ескерілген.
Конституциялық сот төрағасының орынбасары Бақыт Нұрмұхановтың айтуынша, жаңа Конституция кіріспеден, 11 бөлімнен және 95 баптан тұрады.
"Конституцияның Преамбуласы толығымен жаңарды. Онда еліміздің өткенін дәріптейтін, бүгіні мен болашағына бағдар болатын жалпыұлттық құндылықтар көрініс тапты", – деді ол.
Бақыт Нұрмұханов адами капиталды, білім беруді, ғылым мен инновацияны дамыту мемлекет қызметінің стратегиялық бағыты ретінде танылғанын айтты.