Қару асынған тәртіп сақшылары шағын несие беру ұйымының есігін іштен жауып, тексеру жүргізіп жатыр. Салымшы халық сеңдей соғылысып, кеңсе алдында кес-кестеп жүр. Олардың барлығы қалтасындағы қаржысын еселеп көбейту үшін тапқан-таянғандарын қаржы ұйымына салып қойғандар. Арасында 100 мың теңгелерін «миллиондап қайтарып алдық» дегендер де табылып жатыр.
Салымшы:
- Адамдар маңдай термен тапқан 100 мыңын әкеп, миллионнан алып жатыр. Қазір көрсетейін бе?Міне, қараңыз,2 миллион 400 мың теңге алдым. Мешіт салып жатқан адаммын. Ертең бәлен кірпіш алам.
Осылайша қаржысын күдікті мекемеге салып үлгергендер клубтың жабылуына алаңдаулы.
Салымшы:
- Қаланың бюджетіне де қыруар миллион кіріс түсіріп жатыр. Салық төлеп жатырмыз.
Дегенмен қаржы полицейлері тексеруге қызу кірісті. Петропавлдағы бөлімше өкілдері кеше ештеңе ұстатпай, жалтарып үлгерген. Сондықтан осы жолы полиция өкілдері ұйым қызметкерлерін сыртқа шығармай тексеруде.
Раушан Камдиева, несие ұйымының менеджері:
- Өзіміз де түсінбей тұрмыз. Сендер шуламай тұра тұрыңыздар. Бізді шығармай жатыр.
Әбден дүрліккен халық құқық қорғаушылардың кеңседен шығуын күтіп тұр. Барлығы ақшаларының тәркіленуіне алаңдаулы.
Сеңдей соғылысқан халық қаржы ұйымына қатысты бүгінгі тексерудің сырын біле алмай дал.
Ахмет Балмашев,Ақмола облысы прокуратурасының баспасөз хатшысы:
- Көкшетау қаласының тұрғындарынан Ақмола облыстық департаментіне шағым-арыздар түсті. «Казросинвестпроект» пирамида принципімен халықтың ақшаларын өз тараптарына алып жатыр деген. Арыздар бойынша Ішкі істер департаменті қылмыстық іс қозғады.
Қылмыстық іс ҚРҚылмыстық кодексінің 107- бабына сәйкес,яғни,алаяқтық бойынша қозғалды. Ал дәл қазір қаржы ұйымы орналасқан ғимаратта жағдай одан әрі шиеленісіп тұр. Салымшылар ғимараттан тексерушілерді шығарар емес. Полиция болса, сырттағы тұрғындардың әрекетін қадағалауға алды.