Ішкі істер министрлігі өз өміріне балта шапқысы келген офицердің жарының үндеуіне қатысты пікір білдірді, - деп хабарлайды Tengrinews.kz тілшісі.
"ОВ 156/2 мекемесінің басшысының орынбасары суицидке бармақшы болғаны туралы: қазіргі уақытта Т.Аманбаев ауруханада жатыр, оған медициналық және психологиялық көмек көрсетіліп жатыр. Осы мәселе ІІМ бақылауына алынды. Ішкі істер министрінің тапсырмасымен өңірге өзіндік қауіпсіздік департаменті қызметкерлері жіберілді", - делінген хабарламада. "Тексеру барысында біз оқиғаның мән-жайын анықтайтын боламыз", - деді ІІМ басшысы Ерлан Тұрғымбаев. Амантаевтың жары осыған дейін, сотталушы Андрей Кондратенконың өліміне қатысты өзіне көрсетілген психологиялық қысымды көтере алмағанын айтты. Әйелдің айтуынша, оның күйеуі қылмыс істемеген. 18 маусымда Өскемен қаласындағы ОВ 156/2 мекемесінің камерасында сотталушы Андрей Кондратенко асылып тұрған жерінен табылған. Тергеу басталды, қылмыстық іс қозғалды. Мекеме басшысының орынбасары - Талант Амантаев тәртіптік жаза салдарынан қызметі төмендеді.