Табыс жолы
Әмина алты жасынан бастап ән әлемімен біте қайнасып келеді. Музыка бұл жай ғана хобби емес, ол өзгелерге шабыт беріп, сөзбен жеткізе алмайтын сезімді білдіру тәсілі. Әмина Қазақстан мәдениетінің дамуына үлес қосуды армандайды, себебі өнер адамдарды біріктіреді деп сенеді.
Музыкамен қоса, ақыл-ой және дене белсенділігінің арасындағы тепе-теңдікті сақтауға септігін тигізетін спортпен айналысады. Спорт мақсатқа жетуге қажетті тәртіп пен ерік-жігердің қайнар көзі.
Жетістіктері
Табандылық пен өз ісіне деген сүйіспеншілік Әминаның көптеген жетістікке жетуге жол ашты. Атап айтсақ:
• «Тәуелсіздік ұланы» сыйлығы, 2021 ж.;
• «Тәуелсіздік ұрпақтары» облыстық сыйлығы, «Мәдениет» номинациясы, 2024 ж.;
• Х Халықаралық «Harmony» байқау-фестивалі, І дәрежелі лауреат (Түркия – Грузия, 2022 ж.);
• III Халықаралық «Global Art Competition» байқауы, І дәрежелі лауреат (Түркия, 2023 ж.);
• II Ашық бүкілресейлік «Perpetuum Mobile» байқауы, Гран-при (қазан, 2023 ж.);
• IV Республикалық «Отанның Әні» байқауы, І дәрежелі диплом (Павлодар, 2023 ж.).
Бұл марапаттар оның талантының, еңбекқорлығының және өзін-өзі дамытуға деген талпынысына дәлел.
Қор шәкіртақысы
Нұрсұлтан Назарбаев Қорының шәкіртақысы туралы Әмина бірнеше жыл бұрын біліп, соған жетуді мақсат тұтқан. Мақсатқа жетудегі басты қиындық – өзіне деген сенімділікті жоғалтпау еді, бірақ отбасы, ұстаздары мен достарының қолдауының арқасында барлық кедергіні еңсерді.
Әмина үшін бұл стипендия еңбегінің өтеуі ғана емес, сонымен қатар одан әрі даму мүмкіндігі. Бұл оған оқуға, жаңа байқауларға қатысуға және Қазақстанда классикалық музыканы танымал етуге бағытталған жобаларды жүзеге асыруға зор мүмкіндік береді.
Қазақстан жастарына айтар кеңесі
- Алдыңызға мақсат қойып, күшіңізге сеніңіз. Табандылық, сүйікті ісіңізге деген махаббат және өзіңізге деген сенім кез келген қиындықты жеңуге көмектеседі. Егер арманыңызға табанды түрде қадам бассаңыз, биік белестерді бағындыра аласыз, – дейді Әмина Ғабдуллина.
Әмина өзгелерді арманына адаспай жетеріне сенуге және сол жолда табандылық танытуға үндейді.