Д. Иманқажыға Азия ойындарын ұйымдастыру комитеті дирекциясы, сонымен қатар өзі мүшесі болып табылатын Алматының марафоншылар клубы қолдау көрсеткен. VII-ші қысқы Азия ойындарының екі астанасының арасын жаяу жүгіріп өткен Д. Иманқажы бұл спортпен 4 жылдан бері айналысып келеді.
«Жол бойы кездескен елді мекендерде тұрғындармен жүздесіп, салауатты өмір салтын насихаттап келдім»,-дейді марафоншы.
«Астана мен Алматы қалаларында болатын қысқы Азия ойындарын халық болып, мемлекет болып насихаттап жатсақ, біз үшін абыройлы болар еді. Мысалға, біздің елге киноның атақты әртістері келіп жатыр. Сол сияқты спортта да осындай әйгілі спортшылар келіп, Қазақстанды танытып жатса, өте жақсы болар еді. Сондықтан осы шараға мен де өзімнің бір ниетімді көрсетсем дедім. Мақсатымыз, рухымыз бір болса, талай табысқа жетуге болады», дейді Д. Иманқажы.