Фильм бір жарым жылда түсіріліп біткен. Оңтүстік Қазақстандық қуыршақ фильм түсірушілер дүниеге әкелген анимациялық үлгі Алдар көсе туралы дәстүрлі туындылардан өзгешелеу. Онда Алдар көсе бәлекеттерді тек даналығы мен батылдығының арқасында ғана емес, сондай-ақ, шығыстың жекпе-жек тәсілдерін жетік меңгерген ширақтығымен де жеңіп шығады. Қуыршақ фильм қазіргі заманғы жаңа ән-саздармен өңделген.
Қуыршақ фильмнің премьерасы 28-қыркүйек пен 4-қазан аралығында Алматыда өтетін "Шәкен жұлдыздары" халықаралық кинофестивалінде жасалады.
Оңтүстік Қазақстандағы "Жебе" студиясы өзінің тұңғыш қуыршақ фильмін 1999-жылы түсірген. 2001-2002-жылдарда студия алғашқы марапаттарға ие болып, ҚР мәдениет, ақпарат және қоғамдық келісім министрлігінің бірінші және екінші дәрежелі дипломдарын жеңіп алды. Былтыр бұл студия журналистердің кәсіби мерекесіне орай Оңтүстік Қазақстан облысының әкімшілігі жариялаған деректі фильмдер байқауында бас жүлдені қоржынға салды.