«14 шілде күні облыс прокуроры қылмыстық іс қозғады», – дейді облыстық прокуратураның мемлекеттік органдар қызметін қадағалау жөніндегі басқарма бастығы Қанат Мамаев. «Атқаратын жұмыс өте көп. Құжаттарды анықтап, балаларға құйылған қанның донорын табу қажет. Осы іске қатысы бар, осындай жағдайға жеткізген адамдардың бәрінен түсініктеме алынады. Көптеген сараптама жүргізіп, аурудың себебін анықтау керек», - деді прокурор.
Қ. Мамаевтың айтуынша, тергеу жүргізу үшін ішкі істер қызметкерлерінен тұратын арнайы топ құрылды. Олармен қатар прокуратура қызметкерлері де жұмыс істейтін болады.
Қ. Мамаевтың сөзіне қарағанда, түсінік беру үшін ең әуелі дертке шалдыққан балалар жатқан үш аурухананың бас дәрігерлері мен олардың орынбасарлары шақырылған.
Осыған дейін хабарланғындай, ОҚО соңғы айларда ВИЧ инфекцияға шалдыққан 2 айлықтан үш жас аралығындағы 14 бала анықталған. Олардың бәрі бірнеше мәрте ауруханада жатып шыкқан және балаларға қан құйылған екен. Алғашында дәрігерлер, бұл балалардың ата-аналарында да қатерлі дерт болуы мүмкіндігін айтқан еді. Бірақ, белгілі болғандай бүлдіршіндердің басым бөлігі жағдайы жақсы отбасылардан шыққан.