Бұл туралы бүгін ҚР Ішкі істер министрлігінің Мемлекеттік тіл және ақпарат департаменті бастығының орынбасары Қаламқас Темірова мәлім етті.
Оның хабарлауынша, осыдан екі күн бұрын облыстағы фирма директоры телефон арқылы өзіне және оның жүргізушісіне қарақшылық шабуыл жасалғаны туралы хабарлады. Жәбірленушінің мәліметі бойынша «Павлодар -Екібастұз» автожолында бетперде киген үш адам шойын мылтықтан автомашинаны атып, 2 миллион теңге тұратын алтын бұйымдарын және ақшаны алып кеткен. «Тексеру барысында филиал директоры, жүргізуші және тағы бір облыс тұрғынының өзара келісіп, қарақшылық шабуылды ұйымдастырғандары анықталды. Осы алаяқтық әрекеттен кейін олар барлық алтын бұйымдарын және ақшаны өзара бөлісіп алған. Қазіргі кезде фирма директоры және оның жүргізушісі ұсталды. Үшінші алаяқ іздестірілуде», - дейді Қ.Темірова.