Павлодарда өмір бойы бас бостандығынан айырылғандарға арнап салынып жатқан түрме облыс меншігіне беріледі және алдағы уақытта ол коммерциялық мақсатта пайдаланылмақ. Бұл туралы ІІМ Қылмыстық-атқару жүйесі комитеті төрағасының орынбасары Жанат Кешубаев мәлім етті.
«Павлодар облысының әкімі құрылыс нысанын коммерциялық мақсатта пайдалану үшін облыс меншігіне алуға қарсы емес», - деді ол дүйсенбі күнгі брифингте.
Алайда, Ж.Кешубаев ғимараттың қандай мақсаттарға пайдаланылатынын айтқан жоқ.
«Қалай пайдалану жағын әкімнің өзі біледі», - деді ол.
Оның айтуынша, «қажеттілік болмағандықтан түрме құрылысы тоқтатылған» көрінеді.
«Құрылысты жалғастырмаймыз. Құрылыс басталған кезде өмір бойы бас бостандығынан айырылғандарға арналған түрме 1500 орындық болады деп жоспарланған-ды. Болжам шындықтан алшақ болып шықты. Қазір бізде 110 адам өмір бойы еркінен айырылған. Сондықтан түрме құрылысын жалғастырудың қажеті жоқ», - деді Ж.Кешубаев.