Қайын атасы келінін пышақтап тастады. Келінінің ауыр сөздерін көтере алмаған қайын атасы келініне пышақ сұғады. Айдың-күннің аманында, күндіз, арақ-шарапқа масаймай-ақ қылмысқа барған кісінің ісі облыстық мамандандырылған ауданаралық қылмысты істер жөніндегі сотта қаралып жатыр, деп хабарлайды otyrar.kz.
Кикілжіңнің басы сөзге келуден басталған. Үй іргесіне көлігі қоюға рұқсат берген атасының сөзіне қарсы шыққан келіні мен атасының арасында дау туындаған. Жоқ жерден жанжал шығып, қайын атасы келінін жарақаттау мақсатында асхана пышағын алып, келінінің соңынан ереді.
Мырзахмет Сейдахметұлы, ОҚО прокуратурасының басқарма прокуроры: «Асхана пышағын жасырып, балалары қылмысты пиғылын іске асыруға кедергі келтірмесін деп, келінінің соңынан дәретханаға кірген. Сол иығының үстінен пышақпен соққы жасаған. Жаны ұшырған келіні көмекке шақырып, дәретханадан қашып шыққан. Аулада тұрған балалары әкесінің қылмысты пиғылын соңына дейін орындауға кедергі болады.»
Келінімен кикілжіңге келген қайын атасы өлтірмек ниетінің болмағанын айтады. Пышақтап сабақ беріп, сабасына түсірмек бопты.
Дәулетбек Рахманалиев, сотталушы: «Өлтірем дегенім жоқ, сабасына түсіргім келді. Сабақ болсын дедім. Оның боғауыз сөздеріне шыдай алмадым. Мұндай боғауызды ешкімнен естіп көрген емеспін. Келінім бұрын да сотты болған. Өзі есепте тұрады. Өлтіргім келмегенін тағы айтам.»
Айта өтейік, аталған қылмыс бойынша сот ісі ОҚО мамандандырылған ауданаралық қылмыстық істер сотында жалғасып жатыр.