Бұған дейін еврейлердің "Ор-Авнер" білім беру кешені екі жыл бойы еврей мәдени орталығының жанындағы бастауыш мектеп ретінде жұмыс істеп келген болатын. Ал 1-қыркүйектен бастап ол мемлекеттік үлгідегі орта білім бергендігі туралы аттестат табыс ету құқығына лицензия жүзінде ие болу арқылы толыққанды орта мектепке айналып отыр.
Жалпы білім беру бағдарламасымен қатар бұл мектепте еврей халқының тарихы мен мәдениеті оқытылатын болады. Әсіресе иврит қарпін оқытуға баса назар аударылмақ. Ұлттың ана тілін Израильден арнайы келген мұғалімдер үйретпек.
Бүгін аталмыш білім ошағында алғашқы қоңырау соғылды. Онда 1-11 сынып аралығындағы 51 оқушы партаға отырды.