Ержет 29 қаңтарда Португалияның үшінші лигасында ойнайтын «Gondomar s.c» командасымен жартыжылдық келісімшартқа қол қойды. Ол Еуропа есігін ашқан тұңғыш шынжаңдық футболшы болып отыр. Португалдық ұжымның қақпасын күзетуді міндетіне алған ол алдағы уақытта өзін жақсы қырынан таныта алса, Еуропа алаңдарына жол ашылуы әбден мүмкін.
Ержет 1993 жылы Шығыс Түркістанның Тарбағатай аймағында туылған. 2009 жылы Астанада өткен президент кубогында Қытай жастар құрамасы атынан қатысып, жақсы қырынан танылған.
Қытай премер лигасындағы бірқатар командалардың жасаған ұсыныстарына қарамай, Португалияның төменгі лига командасын таңдауының себебін ол «Еуропада ойнау - бұрыннан бергі арманым. Сол үшін Еуропаға барамын», - деп түсіндіреді.
Айта кетейік, «Gondomar s.c» командасы 1921 жылы құрылған. Порту аймағындағы Gondomar қаласына орналасқан. Бұл команда бұрын Португалияның А дәрежелі лигасында ойнаған. Кейін келісілген матчтарға қатысы бар деген шешімнен соң төменгі лигаға түсірілген.