«Қазақстан халқы әдебиеті және ұлттық сәйкестік» атты конференцияда таныстырылған кітаптарды ғалым, жазушы Уәлихан Қалижанов басшылығымен М.Әуезов атындағы әдебиет және мәдениет институты құрастырып шығарды.
Олардың қатарында «Қазіргі әдебиеттегі жалпы адами құндылықтар», «Қазақстандағы қазіргі заман фольклоры», «Заманауи кезеңдегі Қазақстан халқы әдебиеті», «Қазақстан халқының музыкалық өнері», «Қазақстан халқы әдебиеті», «Қазақстан халқының сахна өнері», «Мәдени полилог: Қазақстан халқының бейнелеу өнері» сынды бірінші ұжымдық монографиялар қатысушылар назарына ұсынылды.
Рәсімде сөз алған ҚР Премьер-Министрінің орынбасары Бердібек Сапарбаев аталмыш шара Қазақстан халқы Ассамблеясының жылы аясында өткізіліп жатқанын ерекше атап өтті.
«Өздеріңіз білесіздер, осыдан 20 жыл бұрын, Мемлекет басшысы Нұрсұлтан Назарбаевтың бастамасымен құрылған Қазақстан халқы Ассамблеясының қазіргі таңда біздің ұлт, біздің елдің ішінде ғана емес, бүкіл дүниежүзі үшін үлкен орны бар. Әрбір халықтың тұрмысы, хал-ахуалы, оның экономикасына байланысты болады. Ал экономиканың дамуы үшін сол мемлекетте тұрақтылық, келісім, тату-тәтті өмір қалыптасқан болуы керек. Елбасы Нұрсұлтан Назарбаев өткізіп отырған саясатының арқасында осы 20 жылдан бері көпұлтты Қазақстанда ешқандай қантөгіс, соғыс болған жоқ», - дейді вице-премьер.
Оның пікірінше, Қазақстанда тұрып жатқан барлық халықтардың өкілдері өздерінің тарихтарын, дәстүрлерін, әдебиеттерін, мәдениеттерін ұмытпау үшін жағдай жасалынуы керек.
«Әдебиет тек қана бір ұлттың әдебиеті болып қалмауы керек, сол мемлекетте тұрып жатқан барлық халықтардың әдебиеті болуы керек. Өздеріңіз жақсы білесіздер, Мемлекет басшысы біздің мемлекетімізде тұрып жатқан ұлттардың әдебиетінің, мәдениетінің, өнерінің, білімдерінің дамуына үлкен жағдайлар жасауда. Әрбір облыстарда ұлттық мәдени орталықтардың, достық үйлерінің бар екендігін білесіздер. Әлемде Қазақстан сияқты 5 тілде өнер көрсететін театрлары, 15 тілде шығатын газеттері бар елдер көп емес шығар», - деп түйіндеді сөзін Б.Сапарбаев.