Енді кәсіпорын Еуразиялық экономикалық одақ шеңберінде Омбы қаласында зауыт салуды жоспарлап отыр, деп хабарлады www.24.kz.
Отандық ортада өз орнын алған Петропавл құбыр зауытының Ресей нарығына шыққанына 2 жылдай болды. Осы уақыт аралығында кәсіпорын өз өнімімен Омбы, Түмен және Қорған облыстарын қамтамасыз етіп, енді шағын зауыт ашуды көздеп отыр. Қазақстан мен Ресей қарым-қатынасы екі елді жалғап тұрған Ертіс өзеніндей тоқтаған емес. Мәселен, бір ғана Омбы облысында бірлескен 200-дей кәсіпорын табысты жұмыс істеп жатыр. Соның арқасында осы өңір мен Қазақстан арасындағы тауар айналымы өткен жылы 400 млн АҚШ долларынан асқан. Ресей - Қазақстанның негізгі сауда-экономикалық әріптесі. Әсіресе шекаралас аймақтардың саудасы жүріп тұр.
Тараптар тек сауда-экономикалық тұрғыда ғана емес, достық қарым-қатынаста да жақсы. Омбы қаласындағы Шоқан Уәлиханов атындағы көше толық жөнделіп, бойына ұлы ғалымның ескерткіші орнатылған.