"Бізге жаңа ғана келіп түскен ақпаратқа сәйкес 30 мамыр күні 14 сағатта Тяньшуй қаласындағы темір жол станциясында қайырымдылық көмек жергілікті билік өкілдеріне ресми түрде табыс етілді", - деді С. Мұратбекова.
Оның айтуынша, "жүкті қабылдаушы ресми тұлға ретінде Ганьсу провинциясының халықтық үкіметінің партиялық хатшысының орынбасары Чан Чжухун мырза айқындалды, ал жүкті таратуға жауапкершілігі Ганьсу провинциясының азаматтық әкімшілік басқармасына жүктелді".
Еске сала кетейік, Сычуань провинциясында болған жойқын жер сілкінісінің салдарынан қалыптасқан ахуалға сәйкес Қазақстан Қытайға қайырымдылық көмек жолдады.
Мамырдың 24 мен 26 аралығында Қазақстаннан теміржолмен қайырымдылық көмек жүгі тиелген 19 вагон жөнелтілді. Жүк Ганьсу провинциясының Тяньшуй станциясына ресми түрде 30 мамыр мен 3 маусым аралығында жеткізіледі.
Қайырымдылық көмек жүгінде төсек жабдықтары, 40 орынды қысқы шатырлар, киімдер, ет консервілері мен медициналық "трамадол" препараты бар.