Нұрсұлтан Назарбаев, Қазақстан Республикасының Президенті:
-Индустрализация саласындағы инвесторлар табыс және жер салығынан 10 жылға, ал мүлік салығынан 8 жылға босатылады. Ал, тапсырысы толық орындалған соң нысанды салуға кеткен шығынның 30 пайызын мемлекет өтейді. Шетелдік кәсіпкерлер инвестициялық жобаны жүзеге асыру үшін ел аумағына өз жұмысшыларын ешқандай рұқсатсыз кіргізе алады.
Сондай-ақ, Президент инвесторларды еліміздегі кәсіпорындарды жекешелендіру науқанына, яғни 700 компанияны сатып алуға белсенді түрде қатысуға шақырды. АлҮкімет мүшелеріне еліміздегі жоғары оқу орындары мен колледждерді басқаруға шетелдік инвесторларды тартуды тапсырды. Жалпы, БҰҰ зерттеуі бойынша, еліміз инвестиция тарту жағынан үздік 20 мемлекеттің қатарында екен. Алдағы уақытта шетелдік кәсіпкерлердің қазақ жеріне қызығушылығы бұдан да еселене түспек. Өйткені, енді шекарамыздан он мемлекеттің кәсіпкерлері визасыз өте алады. Жыл соңына дейін кәсіпкерлерге жерді жалға беру жүйесі де барынша жеңілдетіледі. Ал келесі жылы әлем миллионерлері Шымкентте кездесетін болды. Бүгін, сондай-ақ, Нұрсұлтан Назарбаевқа Халықаралық көрмелер бюросының туы салтанатты түрде табыс етілді.