"Біз үкіметтік комиссияның Алматыдағы құрылыс салу ахуалына обьективті баға бергенін қалаймыз және бізді де осы комиссияға қамтуын сұраймыз. Оған жұртшылық өкілдері де қатысуға тиіс", - деп мәлімдеді С. Матаев.
Еске сала кетейік, өткен аптада үкіметте мемлекет басшысының тапсырмасымен республика премьер-министрінің басқаруымен қаладағы құрылыс саласына тексеру жүргізетін үкіметтік комиссия құрылды. Елбасы комиссия құруды тапсыра отырып, премьерге хатында: "Менің тікелей нұсқауыма қарамастан, "Медеуде" зәулім тұрғын үйлер салу жалғасуда, Кіші Алматы шатқалында "Медеуге" дейін түгелдей құрылыстар салынған, Бутаковкада бәрін қоршап тастаған, өзенге адамдар өтетін жер де жоқ. Алматылықтардың наразылығында шек жоқ. Үлкен Алматыда заңды бұза отырып, жүздеген экологиялық нормадан тыс құралыстар салынған" , деп мәлім еткен. Президент " бассыздықты тоқтауға" пәрмен берді.
Комиссия құрамына қаржы, әділет, экономика және бюджеттік жоспарлау, индустрия және сауда, қоршаған ортаны қорғау министрлері, төтенше жағдайлар министрі, жер ресурстарын басқару жөніндегі агенттіктің төрағасы, сондай-ақ бас прокурордың орынбасары кірген.