Өрт туралы ақпарат кезекші пультке жергілікті уақытпен 17 сағат 30 минутта келіп түскен. Мектеп ғимаратына өрт сөндіруші 5 машина жіберіліп, бір сағаттай уақытта тілсіз жау ауыздықталды. Зардап шеккендер мен құрбан болғандар жоқ.
Тәрбиешілер өрт сөндірушілер келіп жеткенге дейін жанып жатқан ғимараттан 200-дей баланы шығарып үлгерген. Мемлекеттік өртке қарсы күрес қызметінің облыстық басқармасы мамандарының айтуынша, интернат қызметкерлері сауатты әрі шапшаң қимылдаған.
Өрттен ғимараттың екінші қабаты едәуір зардап шекті. Әбден тозығы жеткен ғимараттың ішкі құрылғылары өрттің тез таралуына түрткі болса керек.
Тергеушілердің алдын-ала жорамалы бойынша, өрт балалардың отпен ойнауынан шыққан. Ал интернат тәрбиешілері болса, электр жалғастыру желілерінде қысқа тұйықталу болған деп пайымдайды.
Мемлекеттік өртке қарсы күрес қызметінің облыстық басқармасының баспасөз орталығы қызметкерлерінің айтуынша, өрттің шығу себептері мен шығын мөлшері есептелу үстінде.