Мәселен, 2003-жылы "Ауылшаруашылығы өндірісін табиғи сипаттағы зілзалалар мен малдың қатерлі індеттерінен сақтандыруға қолдау көрсету жөніндегі" бағдарламаны орындау мүмкіндігі қамтамасыз етілмеген. 2003-2004-жылдары ауылшаруашылығы өнімін өндірушілермен арада сақтандыру туралы келісім-шарттары жасалмаған. Сонымен бірге технологиялық мал сою желісінің жабдықтарын дер кезінде сатып алып орнату, өндірістік база желісін қалыптастыру, ауылдарда ақпараттық-консультациялық орталықтар мен несиелік серіктестіктер желісін құру шаралары іске асырылмағандықтан, бұл республикалық бюджет қаржысын тиімсіз пайдалануға апарып соқты.
"Сонымен бірге рынокта жаңаша өңделген және жаңа технологияға негізделген жаңа өнімдердің пайда болғанына қарамастан, малшаруашылығы өнімдерін сатып алып өңдеу ескірген Мемлекеттік стандарттардың негізінде жүзеге асырылуда",- дейді есеп комитетіндегілер.
"Агроөнеркәсіптік кешен саласындағы қолданбалы ғылыми зерттеулер" атты бағдарламаның орындалуына бақылау жасау барысында белгілі болғанындай, ауылшаруашылығы министрлігі бюджеттік сұраным жасаған кезде ғылыми-зерттеу жұмыстарының тақырыбы мен өндірісті ғылыми қамтамасыз ету бағыттары бойынша бюджет қаржысына деген нақты сұранысқа негіздеме есептер жасамаған. "Бұл өз кезегінде ауыл шаруашылығы саласындағы ғылыми зерттеулердің нәтижесін тәжірибе жүзінде пайдалануға кері әсер етуде",- дейді есеп комитетіндегілер.