Тренингті Орталық Азия елдерінде есірткінің таралуына жол бермеу және шекараны басқару ісін жетілдіруге қолұшын беру бағдарламасы аясында Еуропалық Одақ қаржыландырып отыр. Үш айға созылатын тренинг шарасына Қазақстан, Қырғызстан, Өзбекстан және Тәжікстаннан 20 шекарашы қатысады.
Шара барысында кинолог мамандар иісшіл иттерді асырау, өсіру және оларды есірткі іздеуге машықтандыру әдістерін меңгереді. Дәріс сондай-ақ инструкторларды дайындау, Орталық Азия елдерінің кинолог мамандары арасындағы аймақтық ынтымақтастықты нығайту мақсатын көздейді.
Шараға ҚР ҰҚК шекара қызметінің орталық питомнигінің, ҚР Кеден қызметі аймақтық кинологиялық орталығы мен ҚР ІІМ кинологиялық орталығының таңдаулы мамандары қатысады. Сонымен бірге оған Еуропадағы қызметші иттерді өсіруші жетекші кинологиялық мектептердің халықаралық мамандары шақырылған.