Баспасөз қызметі хабарлағандай, ҚР үкіметінің қаулысымен ҚР Жер ресурстарын басқару жөніндегі агенттігінің төрағасы болып Өмірзақ Өзбеков тағайындалған. Ол бұған дейін Қазақстан Республикасының Қырғызстандағы төтенше және өкілетті елшісі қызметін атқарған.
Ө. Өзбеков 1947 жылы 10-қарашада Алматы облысының Бақанас ауылында дүниеге келген. Мал дәрігері мамандығы бойынша Алматы мал дәрігерлік институтын бітірген. Еңбек жолын 1971 жылы бастаған. 1991 жылдан Алматы облыстық агро өнеркәсіп комитеті төрағасының орынбасары, кейіннен Алматы облыстық әкімшілігі басшысының орынбасары лауазымында болған.
1994 жылдан бастап Алматы облыстық әкімшілігінің басшысы, кейіннен әкімі болған. 1996 жылдан Талдықорған облыстық әкімшілігінің басшысы тұрған.
1997 жылдан бастап ҚР-ның Өзбекстан Республикасындағы төтенше және өкілетті елшісі. Ал 2003 жылдан соңғы уақыттарға дейін ҚР-ның Қырғызстан Республикасындағы төтенше және өкілетті елшісі қызметін атқарған.