Кездесу барысында Қ. Бозымбаев ағымдағы жылдың бірінші жартысындағы "Самұрық" компаниялар тобының жұмыс нәтижелері, холдингтің даму перспективалары жайында президентті хабардар етті.
Ол теміржол саласының ірі инвестициялық жобаларын жүзеге асыру барысы жөнінде хабарлады.
"Бұл локомотив құрастыратын зауыттың құрылысы, электровоздарды жаңарту жобасы, Екібастұз қаласында жаңа вагон құрастыратын өндірісті құру. Осы жобаларды жүзеге асыру "Қазақстан темір жолы" ұлттық компаниясының жолаушылар вагондарын санамағандағы жылжымалы құрамға деген қажеттілігін толығымен жабуға мүмкіндік береді", - деді журналистерге арналған брифингте.
Холдинг жетекшісі сондай-ақ, президентке электр энергетикадағы іске асырылып жатқан жобалар, атап айтқанда, Балқаш жылу электр станциясы және Мойнақ су электр станциясы туралы әңгімеледі. Мемлекет басшысы осы жобаларды тездетіп жүзеге асыруды тапсырды.