Тәртіп сақшылары 18 жастағы Алтынай Әбішеваның денесін Ертіс өзенінен алып шыққан, деп хабарлайды Caravan.kz медиа порталы.
Ағайынды Алтынай мен Абзал 7 сәуір күні із-түзсіз жоғалып кеткен. Тіпті 18 және 16 жастағы колледж студенттерін көрген-білген жан табылмады.
Артынша, ұшты-күйлі жоғалған қыз бен ұлды іздеуге шыққан 300-ден астам адам, тек олардың сөмкесін ғана тауып алған болатын.
Алтынайдың жансыз денесі шаһардан 13 шақырым жерден табылып отыр. Қыздың өз-өзіне қол жұмсағаны немесе әлде біреудің қолынан қаза болғаны әзірге белгісіз. Қазір полиция қызметкерлері қылмыстық іс қозғап, тергеу жүргізуде.
Ертіс өзенінің жағалауынан бауыры Абзалды да іздестіріліп жатыр.
"Ертіс өзенінен 18 жастағы қыздың денесі табылды. Сотқа дейінгі тергеу және баланы іздеу жалғасуда. Барлық қажетті сараптамалар тағайындалды. Тергеу барысы ерекше бақылауда",- деді Абай облысы ПД бастығының орынбасары Елдос Зәкімов.