Қыс қаһарына мінгелі пәтерлері бір жылынбаған жұрт бүгінге дейін талай басшыға шағымданған. Амалы таусылған тұрғындар ақыры аудан мен жауапты мекеме басшыларын бетпе-бет кездесуге шақырды. Алайда бұл жолы да шенділерден естігендері уәде ғана.
Дәрібала Құсайынова, Щучье қаласының тұрғыны:
- Ештеңеге сенген жоқпыз. Білмейміз не болатынын. Үйлеріміз ұлып тұр, 15 градус жылыту құрылғысымен. Жарыққа, жылуға төлейміз, сонда қайда бәрі барып жатыр?
Жылу беретін мекеме ғана емес, пәтер иелері кооперативінің де кінәсі бар екен. Өйткені, көпқабатты 17 үй жылу маусымына әзір болмаған. Құбырлар тозып, қондырғылар жылуды айдауға қауқарсыз болса да, үй жылыту маусымына дайын деп есеп беріпті. Осыны естігін тұрғындар салдыр-салақ коопертив төрағасын алып тастап, жаңасын сайлады. Бір қызығы, бұл үйлердің қысқа әзірліксіз қалғанын коммуналдық шаруашылық басшылары да білмеген.
Гүлмира Байғожина, Бурабай аудандық тұрғын үй-коммуналдық шаруашылық бөлімінің бастығы:
- Жылуға әзір емес екенін білген жоқпын. Мен қыркүйек айынан бастап қана басқарып келемін. Бізге бәрі дайын деп есеп берді ғой. Қазір кінәлі адамды іздейміз.
Қазір барлығы сабылып, қақаған қыста жұртты жылусыз қалдырған кінәліні іздеп жатыр. Екі ортада тұрғын үйлерден бөлек, 1060 оқушысы бар мектеп те, балабақша да ұлып тұр.