Қор мен облыстық әкімшілік өкілдерінің бірлескен баспасөз мәслихатын өткізуіне 21-маусымда болған оқиға әсер етті. Бұл күні қор салымшылары қаладағы көше қиылыстарының бірін жауып тастаған. Олар 1-шілдеде аяқталады деп межеленген құжаттарды тіркеу жұмыстарының баяулығына наразылық білдірді. Инвестициялық кітапшаларды қайта тіркеу үшін алыс аудандардан келіп жеткен адамдар тіпті түні бойы кезекке тұруға мәжбүр болған. Аптап ыстықта ұзақ уақыт бойы далада жүрген адамдардың біразына жедел жәрдем көлігін шақыруға тура келген.
Облыс әкімінің орынбасары Светлана Бурлаченконың айтуынша, қор өкілдерінің тіркеу жұмысын дұрыс ұйымдастыра алмауы ахуалды ушықтырып жібере жаздады.
Ал "Бутя-капитал" қорының өкілдері болса, кемшіліктерін мойындап, оны жоюға уәде берді. Атап айтсақ, ахуалды тұрақтандыру үшін тіркеу мерзімі 15-шілдеге дейін ұзартылды.