"Биохим" компаниясы басшылығының ақпараты бойынша, жобада Солтүстік Қазақстан облысының Тайынша ауылында қазіргі заманғы озық технология негізінде жергілікті астықты өңдеуге мүмкіндік беретін өндірістік кешен құрылысын салу арқылы құрамындағы октан мөлшері жоғары келетін "биоэтанол" жанармай қоспасын, азық-түлік өнеркәсібіне арналған жоғары сапалы желімтік, сондай-ақ мал шаруашылығының қажеттігі үшін азықтық ашытқы тәрізді жоғары технологиялық өнімдер түрін шығару қарастырылған.
Мамандардың бағалауынша, биоэтанол негізіндегі отын қоспасын қолдану жанармай жанған кезде түзілетін зиянды заттардың мөлшерін 40-80 процентке төмендетіп, қозғалтқыштың жұмыс тиімдігін арттыруға мүмкіндік береді.
Бұл жоба Қазақстан Даму банкінің несиесі есебінен, сондай-ақ шетелдердің несиелік қаражаты мен "Биохим" компаниясының жеке қаржысы есебінен қаржыландырылады.
Үкімет басшысының айтуынша, жобаның таза экспортқа бағытталатындығы оның оңды сипатын айқындайды. Д.Ахметовтың пікірінше, отандық шикізат базасы негізінде өндірістен шығарылатын өнім алыс және жақын шетелдерде сөзсіз сұранысқа ие болады. Өйткені, мұндай өнім түріне әлемде сұраныс жоғары және ал қазіргі бар бұл бағыттағы өндірістер барлық сұранысты толыққанды қанағаттандыра алмайды.
Сондай-ақ, Д.Ахметов маңызды мемлекеттік міндеттерді жүзеге асыру тұрғысынан алғанда жоба, біріншіден, ауылдық аумақтарды дамыту бағдарламасына сәйкес келсе, екіншіден, индустриялық-инновациялық даму бағдарламасын іске асыру аясында да айрықша мәнге ие болып табылатынын атап өтті.