Бұл туралы Caravan.kz медиа порталы kazinform.kz-ке сілтеме жасап хабарлайды.
Демалыс күндері су тасқынына қарсы шаралар жүргізіліп жатқан өңірлерге Астанадан 14 гуманитарлық көмек газелі жіберілді. Елорда тұрғындары су тасқынынан зардап шеккендерге киім-кешек, азық-түлік, жеке гигиена құралдары және т.б. жинады. Қазіргі таңда елордада 9 қойма жұмыс істеп тұр. Іс-шараға 30 волонтерлік ұйым, 200 ерікті қатысты.
Аймақтарға көмек жинау пункттері де қарқынды режимде жұмыс істеп тұр.
Ақтөбеге 31 наурызда Түркістан облысынан гуманитарлық көмек келді. Ол сол аймақтағы тасқыннан зардап шеккен тұрғындарға таратылды.
Волонтерлер, қоғамдық белсенділер, мәслихат депутаттары, кәсіпкерлер, Атырау облысының тұрғындары да шетте қалмады. Үш күн ішінде «Күш бірлікте» акциясы аясында олар Ақтөбе облысының тұрғындары үшін 8 тонна гуманитарлық көмек жинады.
Еске сала кетейік, бұған дейін Атыраудан 8 тонна азық-түлік, өзге де заттар Ақтөбе облысына жіберілгенін жазған болатынбыз.