Міне, Мұхтар Құл-Мұхаммед журналистермен, дұрысы - әріптестерімен кездесуге дайындалып жатыр. Шашын тарап, қалжыңға да уақыт бөлді.
Өмірде «бірбеткеймін» деген министр баспасөз мәслихатында осы мінезін көрсетті. Әсіресе, қазақ тілін шеттетіндерге дүрсе қоя берді. Себебі БАҚ-та 50/50 талабы сақталмайды. Әрине, бұл жерде мазаққа ұшырап отырған қазақ тілді көрермен.
Мұхтар Құл-Мұхаммед, ҚР Мәдениет және ақпарат министрі:
- Адамнан қулық артылған ба? Елу деген норманы толықтыру үшін түнде қояды, «Қыз Жібек» деген ескі фильмдерді, айтыстарды қояды қазақтарды мазақ қылған сияқты. Содан кейін біз бұл заңға қайта оралып, оның тәуліктің белігілі бір мөлшерінде қазақ тіліндегі хабар осынша болу керек деген норманы енгіздік.
1-ші желтоқсанға дейін ахуал өзгермесе, телеарналар мен радиолар жаппай лицензиясынан айырылады. Министр «аудармамен ғана айналысып отыр» деп Елбасының қатал сынына ұшыраған «Білім» мен «Мәдениет» арналарын қаржыны үнемдеу үшін біріктіруді ұйғарыпты. Өйткені бюджеттен бөлінген миллиардтардың ақталмағанын мойындады. Сондай-ақ Мұхтар Құл-Мұхаммед сериал көргіш қыз-келіншектер үшін күтпеген жаңалығын жария етті. Енді мемлекеттік арналарда қаптаған шетелдік сериалдар эфирден алынады. Бұдан былай 1 сериясы 1 млн 300 мың теңге тұратын түрік пен кәрістің сериалдары түгел алынады. Қайта бюджеттің қыруар қаржысы отандық өнімді әзірлеуге жұмсалмақ. Қазірдің өзінде мемлекеттік арналар 20-ға жуық қазақстандық фильмнің түсірілімін бастап кеткен.
Мына студия әзірге бос тұр. Бұл жерге жаңа жылдан бастап жан бітеді. Яғни, студия кішігірім кино алаңына айналады. Дәл осы жерде «Тоғысқан тағдырлар Астанада» деп аталатын фильмнің тұсаукесері өтеді.
Қысқасы, баспасөз мәслихатын зілді мәлімдемемен бастаған Мұхтар Құл-Мұхаммед соңында жібіп сала берді. Үлкен жоспарларымен бөлісе келе, қалам ұстаған әріптестерін бір қуантып қойды.
Мұхтар Құл-Мұхаммед, ҚР Мәдениет және ақпарат министрі:
-Биылдың өзінде президенттің «Болашақ» бағдарламасы бойынша 20 -дан астам журналистер шетелге барады. Сіздердің араларыңыздар отыр олардың өздері де. Олардың ішіндегі 7 адам менің қолымдағы дерек бойынша ВВС-ге барады. Бұрын «Болашақпен» инженерлер, мунай-газ саласының мамандарын көбірек қарайтын болсақ, енді журналистерге де көңіл бөлініп жатыр.
Тіпті бүгін министр күтпеген жерден отандық журналистиканың дамуына жоғары баға берді. Және тілшілермен әрдайым бірге болуға уәде беріп кетті.