Ахмет Байтұрсынұлы атындағы Қостанай мемлекеттік университетінің Медиа орталығының директоры Ақылбек Қожаұлы Шаяхметтің 60 жасқа толуына орай мәдени шаралар өтетіні жоспарлануда.
Атап айтқанда, 16 маусым күні, (сағат 18-00) Ілияс Омаров атындағы қазақ драма театрында Ақылбек Шаяхметтің «Шоқанның шері» атты қойылымы көрсетіледі.
17 маусым күні (сағат 15-00) Лев Толстой атындағы облыстық кітапханада Ақылбек Шаяхметтің Астанадағы «Фолиант» баспасынан жарық көрген жаңа кітаптарының таныстырылымы өтеді.
Сонымен қатар жұма күні (сағат 16-00) Максим Горький атындағы орыс драма театрында ақын Ақылбек Шаяхметтің 60 жасқа толуына арналған әдеби-музыкалық шығармашылық кеш өтетіні көзделуде.
Осы шараға Астана мен Алматы қаласынан, сондай-ақ еліміздің бірқатар өңірінен арнайы ақын-жазушылар қатысады.
Айта кету керек, А. Шаяхмет 1951 жылы Қостанай облысының Жітіқара ауданында туып-өскен. Қазақ мемлекеттік университетінің журналистика факультетінің түлегі, Мәскеудің Әдебиет институтын бітірген. Көптеген жыр кітаптардың, прозалық және драмалық шығармалардың авторы.