Шығыс Қазақстанның музыкалық мұрасы — Түркі әлемінің алтын бесігі Алтай мен Шыңғыстау, Баян Өлгей мен Қытайдың Алтай-Тарбағатай арасын алып жатқан дархан дала даусы ежелден ән-жырмен көмкерілген киелі мекеннің зор мақтанышы. Ақтаңгер ақындары мен дәулескер күйшілерінің, жезтаңдай әншілері мен сырлы сыбызғышыларының сиқырлы сазды сарыны атадан балаға мұра. Шертпе күйдің негізін қалаушы күй атасы Байжігіт, қаһарман Кетбұғаның көне сарындары қай жағынан алып қарасаң да ауқымды. Кемеңгер Абай, шежіре Шәкәрім, Әсет пен Жәнібек, сыбызғышылар Шанақ пен Кәлек ақсақалдың есімдері қазақ музыкасының тарихында алтын әріптермен жазылып қалары сөзсіз.
Осынау мол мұраны ұрпаққа үзбей жеткізу мақсатында Шығыс Қазақстан облысының әкімі Бердібек Сапарбаевтың тікелей атсалысуымен Шығыс Қазақстан облыстық мәдениет басқармасы мен облыстық мемлекеттік филармониясы «Шығыс Қазақстанның музыкалық мұрасы» анталогиясын жарыққа шығарып отыр.