"Пробациялық бақылауда жүрген адамдарды электронды түрде бақылау. Бұл жерде электронды білезіктерді енгізу туралы айтылып отыр. Жыл сайын 6 мыңға жуық осы білезіктермен бақылауда жүретін болады", — деді Қасымов Мәжілістегі үкімет сағаты барысында.
Сондай-ақ, ол министрліктің бұл жобаны басқа да мүдделі мемлекеттік органдармен талқылап жатқанын айтып өтті.
"Келесі жылдан бастап мемлекеттік-жекеменшік әріптестік аясындағы жобаны жүзеге асыруды жоспарлап отырмыз", — деді министр. Сонымен қатар, Қасымов бұл жүйенің бақылау ережелерін бұзуға жол бермейтінін айтты.
"Қызметкерлер белгіленген тәртіпті бұзғысы келгендердің кез келген әрекетіне тосқауыл қояды", — деп уәде берді ішкі істер министрі.
Айта кетейік, үкімет сағатының алдында депутаттарға бақылау құралдары көрсетілді. Сотталғандарды және шартты түрде сотталғандарды бақылау мақсатында қолданылатын электронды құралдар таныстырылды.
Сондай-ақ, министрліктің баспасөз қызметіндегілер сотталушылардың осы білезіктер арқылы операторлармен байланысқа шыға алатынын нақтылады. Электронды білезіктің станциясында сотталушының қай жақта жүргені GPS арқылы көрсетіліп, ІІМ серверіне жіберілетін болады.