Шараны Ассамблеяның Төрағасы Нұрсұлтан Назарбаев ашып берді. Айта кетейік, 1992 жылы Елбасы Қазақстан халқы Ассамблеясын құру туралы бастама көтерді. Араға 3 жыл салып ұйым Президент жанындағы консультативті-кеңесші органға айналды. Елімізде түрлі ұлт өкілдерінің мәдениетін, тілін, дәстүрін құрметтей отырып, оның дамуына қажетті жағдай жасау Мемлекет басшысының Ассамблеяға жүктеген негізгі міндеті еді. Бүгінде бұл тапсырма орындалды. Қазақстанда 800-ден астам этномәдени бірлестік жұмыс істейді. Өзге ұлт өкілдері өз тілінде газет-журнал, телерадио хабарларын таратып жатыр. 80-нен аса мектепте білім беру толықтай өзбек, тәжік, ұйғыр, және украин тілдерінде жүргізіледі. Сондай-ақ, орыс, өзбек, ұйғыр, кәріс және неміс ұлттық театрлары жұмыс істейді. Осылайша елімізде діні, тілі, ділі бөлек болса да, Отанға деген сүйіспеншіліктің арқасында жүзден астам ұлт пен ұлыс өкілдері тату-тәтті өмір сүріп келеді.