500-ге жуық тұрғыны бар Ертістің жағалауындағы Кривинка ауылында тасқынның алдын алу шаралары қарқынды жүргізіліп жатыр, деп хабарлайды "Хабар 24". Мұнда өткелдер жөндеуден өткізіліп, қаптарға құм толтырылған. «Құдай бетін ары қылсын, дегенмен сақтықта қорлық жоқ», – дейді тұрғындар. Ғасыр куәсі, соғыс және еңбек ардагері Қизат ақсақал қара сирақ бала кезден бері бірнеше су тасқынының куәсі болыпты. «Жазғытұры Ертістегі судың көтерілуі – қалыпты құбылыс, бұл молшылықтың белгісі, жер көк, мал тоқ болады, тек абдырамай сақтық шараларын орындау керек», – дейді көнекөз қария.
"Бұрын 28-ші жылдары су тасып өтіпті. Ақырғы тасығаны 78-жылы, қайықпен жүрдік көшеде. Ол кезде мынандай трасса жоқ. Су тасығанда төбеге отырдық, үйдің төбесіне, қораның төбесіне. Мал шулап, қабаққа шығарылады" деп сөзін жалғады Қизат Мұқанғалиев.
Мал-жанның амандығы үшін ауылдағы 130 үйдің барлығына ескерту парақшалары таратылған. Мектепте мобильдік электростанса, 30 төсек жабдықталған. Төтенше жағдайлар басқармасы мен «Шығысжарылысөнеркәсіп» мекемесінен барлығы 16 маман 600 келіден астам жарылғыш затты қалыңдығы 60 сантиметрлік мұзға қойды.
"Жетіжар және Кривинка ауылдарының ортасында бізде мұз тұрып қалу қаупі бар. Кептеліп қалады, сол кезде су жағасына шығып, Кривинка ауылына қарай басып кету қаупі бар. Бұл 2015 жылы бізде ондай жағдай болған. Соның алдын алу мақсатында биыл біршама ертерек бұл жұмыстарды жүргізіп жатырмыз" дейді Жетіжар ауылдық аймағының әкімі Сұңғат Назаров.
Аудандық бюджеттен төтенше жағдайлардың алдын алу мен жою жұмыстарына 10 миллион теңге қарастырылыпты.
"Егер Кривинка ауылында жарық өшкен жағдайда, арнайы біз қосалқы дизель моторын апарып қойдық. Қандай жағдай болмаса да, қосымша жарық беріледі. Кривинка, Жетіжар ауылдық округіндегі мұзды өткізу мәселесі бойынша тәулікке арнайы кезекшілік қойылып, бақылауда ұстап отырмыз" дейді Бесқарағай ауданы әкімінің міндетін атқарушы Ербол Рахметуллин.
Ал синоптиктер алдағы күндері өңірде жауын-шашын болатынын ескертті.
