Жарияланды: 60

16 жасар қазақстандық зілтемірші әлем рекордын орнатты

16 жасар қазақстандық зілтемірші әлем рекордын орнатты Сурет - ҚР ААФ

Қазақстандық зілтемірші Рахат Бекболат жасөспірімдер арасындағы Азия чемпионатында әлем рекордын орнатты. Құрлықтық дода Өзбекстан астанасы Ташкентте өтті. 

Бұл туралы Caravan.kz медиа порталы Tengrinews.kz сайтына сілтеме жасап хабарлайды.

Қызылордалық ауыр атлетика мектебінің 16 жастағы түлегі 102 келіге дейінгі салмақта сынға түскен. Ол қос жаттығу нәтижесі бойынша 356 (158+198) келі зілтемірді еңсерді. Осылайша, Рахат Бекболат екінші орын алған қарсыласынан 14 келіге көп көтерді. Бұл көрсеткішпен ол 17 жасқа дейінгі жасөспірімдер мен 20 жасқа дейінгі жастар арасында чемпион атанып отыр. Сондай-ақ ауыратлет жасөспірімдер арасында серпе көтеруде әлем рекордын орнатты. 

Рахат Бекболат 31 жастағы Илья Ильиннің соңғы нәтижесінен озып кетті. Әлемнің төрт дүркін чемпионы Ташкенттегі сайыста топ жарған еді. 102 келіге дейінгі салмақта ол қос жаттығу нәтижесі бойынша 355 (160+195) келі көтерген. 

Рахат Бекболаттың сайысқа түсуімен қазақстандық команда үшін ауыр атлетикадан жасөспірімдер мен жастар арасындағы Азия чемпионаты тәмамдалды. Қазақстан құрамасы 14 медаль жеңіп алды, оның тоғызы - алтын жүлде. 

Пікір қалдырыңыз

Пікір қалдыру тіркелген пайдаланушылар ғана мүмкін