Допты хоккей: Оралдың «Ақжайығы» көш бастаушы команданы 3:1 есебімен ұтты

Оралдың «Ақжайығы» «Жастық» стадионында Орынбордың «Локомотивімен» екінші кездесуін өткізді. Басқа командалардан оқ бойы озық келе жатқан командамен ойынын «Ақжайық» бұл жолы сәтті өткізді. 20-минутта Александр Шавалдин қонақтардың қақпасын дәл көздесе, 44-минутта Дмитрий Пономаренко есепті 2:0-ге жеткізді. Екінші таймда орынборлықтардан Денис Нохрин 77-минутта есепті қысқартқанымен, 85-минутта тағы да А.Шавалдин ойын нүктесін қойды. Сөйтіп «Ақжайық» өз тобындағы күшті командалармен де тайталаса алатынын көрсетті. Бұл турдан кейін 14 ұпай жинаған оралдықтар келесі ойындарын 8-9 қаңтарда өз айдынында турнир кестесінде екінші орында келе жатқан Саратовтың «Универсалымен» өткізеді.